Columns

Coronalia | Ummedenken ...

Ummedenken ...

Jaorn gelaene lei een kleinkind mi-j 't verschil uut tussen 'Normen en Waerden'. Is dat dan neet 't zelfde??? “Nae oma, da's niet hetzelfde.”

Vri-j vertaald begrep ik toen dat 'Normen' de 'gewoonten' bunt die'j hanteert umdat ze now eenmaol zo heurt. En't altied zo edaone hebt umdat iederene 't zo dut. En 'Wearden' staot veur alle dinge wie'j écht belangriek vindt!” Had ze bi-j Maatschappijleer op estokken.

Ná, daor viel oma effen stille van (en dat wil wat zeggen!)

Maor Húlde an scholen wiet kinder zó naor de maatschappi-je leert kieken! Da's pas ummedenken...

Nog zoiets. Heurn ik korts op tillevisie bi-j Buitenhof. Herman Tjeenk Willink was eneugd vanwaegen zienen visie op: “Hoe Wieter Nao de Crisis?” Vervolgens ging zien betoog totaal niet aover 't Ni-je Normaal' van den 1,5 meter en zo. (hoe belangriek misschien ok!) Nae, hee had't veurál aover wat d'r wérkelijk – én hoogneudig- an verandering toe was in de hedendaagse wereld. Hiertoo citeerne o.a. een uutspraok van Albert Einstein. En den luden as volgt: “I-j könt problemen niet oplossen met dezelfde denkwieze as wiet ze veroorzaakt hebt!” (effen twee kere laezen…)“

Dús mot et ánders! Drástisch zelfs! Alleen op die maniere kan een Crisis wallicht een Kans betekenen. Op (en in!) een heleboel gebieden. Kwestie van bewustwording veural! Al geet zoiets helaas nog niet metene vanzelf. Niet in Amerika (práot d'r mi-j niet van!)

Ok in Amsterdam was't nog effen lastig. Dáor umdat soms twee heel belangrieke waerden onmundig krange langs mekare hen könt schuurn. (Maor: wát een Bewustwording!)

En in ons eigen Aalten, wilt ze -zo'k uut de krante begreppe- de gemeentelijke tekorten (nog) 'oplossen' deur't bi-j Jeugdzorg weg te halen. Ik hoppe hartstochtelijk da'k dat verkeerd heb elaezen. Want zo'n gedachtengang völt volgens mi-j écht nog onder't olde normaal. Echter juust daorumme 't ummedenken meer dan weerd...


Sien o Niem

Meer berichten
 

Dagelijks het laatste nieuws in je mailbox ontvangen?

Aanmelden