In wat veur land…(5)

In wat veur land…(5)

Zonder now direct met data's te zwaaien, vermoed ik wélken zin(snede) de leste tied et meeste veurbi-j kwam. (of eig'lijk twee!)

Zowal in't journaal as de krantenköppe kwam 't ons integen: “….MAKEN ZICH ZORGEN OVER…!” En vul wieter maor in wáor al dee viro-, psycho- en andere -logen zich bezorgd aover meken: 't Virus en't vaccin. De zorg en de zieken. De schooljeugd en de oldeleu. De terrassen sequ theaters bunt leug en de parken (te) vol. En gáo zo maor deur.

Dat die zorgen meer as terecht bunt in't huidig tiedsgewricht, 'dat wet miene olde bokse!', zol mien moder vrogger zeggen.

Toch vroag ik mi-j soms af: Wát lost et op at de weld zodoonde allene maor in d'n angst schöt? Trouwens; a'w et toch aover oplossen hebt: Bi-j een hoop (veural!) politicologen mis ik soms nog té vake té völle de klimatologische kante van't verhaal. Dát vin'k eerlijk gezegd dan weer niet bepaold logisch!

En zo kom ik bi-j de tweede zinsnede wiet – waekelijks, zo niet dagelijks - veurbi-j kump, namelijk dat bi-j alles waor wi-j ons op verheugd hadden, 'CORONA ROET IN'T AETEN GOOIT!' Inderdaod; ók een waorheid as een koo!

Echter wi-j denkt toch neet dat zo'n virus helemáols uut zichzelf de ganse weld aover vlüg? Van China naor Europa, naor Amsterdam, naor d'n Achterhook? Of vice versa? Dat kan volgens mi-j iederene met gezond boerenverstand toch bedenken!? Dácht ik tenminsten... Maor korts heurn ik een liesttrekker in den gemoede oreern: 'Dat ziene parti-je nóch in't virus, noch in't klimaat ok maor énig probleem zag.'

Alles wat um (in één aodem) wál grote zorgen baren was: 'Dat straks al dee miljoenen klimaatvluchtelingen ons miljárden euro's gingen kosten!'

Nuumt ze zoiets gin 'gotspe'? Na ja, in elk geval; van zo'n praot zakt mi-j de bokse af...


Ankh Gussinklo

Meer berichten
 

Dagelijks het laatste nieuws in je mailbox ontvangen?

Aanmelden