'Heb 'm nooit 'ezegd hoe goed ik 'm wel niet vond; jammer'
Rocco Ostermanns eerbetoon aan Wietjen Hulshorst
DINXPER - I-j bunt óók een rasechten Dinxpersen a-j wel 'ns uut de mondhuuke bunt 'escheurt van 't lachen, toe-j Wietjen Hulshorst hebt zien voetballen.
Ze hebt 't in Dinxpèr, en dan met name bi-j S.V.D., nog wel 'ns oaver de zogenaamde golden periode.
In den beroemden periode, werden de 'gruun-witten' kampioen van de hoofdklasse, en d'r waren allemoal legendarische 'kickers' bi-j, woarvan de namen binnen de club now nóg met ontzag wordt uut 'esprokken.
Willy Elburg alias 'De Sik', Jan Bussink, Willy te Grotenhuus, en Fredy Schuurman, um d'r moar een paar te nuumen, en ze wordt natuurli-jk joar noa joar noa joar, nóg steeds weer bèter, en da's ook 't mooie van legendevorming.
Ik heb die cracks natuurlijk zelf nooit in de weide zien rennen, moar doarveur heb ik dan weer 't onwaarschijnli-jke geluk 'ehad, da-k Wietjen Hulshorst heb zien ballen!
Met een paar kromme pöte, assoffe dri-j dagen op een peerd had 'ezèten, kwamme drietgemuudli-jk 't veld of de zaal ingesjokst, en 't ouwehoeren stond meteen van quit af an al op zien gezicht 'etekend.
Now hebt jullie natuurli-jk allemoal vast wel 'ns van peerdefluusteraars gehört, moar ik zal 't jullie 'ns op een briefjen geven: Wietjen was volgens mi-j een honderd procent balfluusteraar!
Dat ronde stuksten leer deed álles wat Wietjen wol, en Wietjen wol veural zichzélf én iedereen langs de kante amuseren, want den keerl was zo melig as ik wet niet wat.
Hi-j had nog nét gin clownsneuze veur de kanis.
Den kapriolen-keerl had meer schijnbewègingen op zien repertoire dan Elvis liedjes!
Hi-j schudden ietskes met één van ziene kleine scharrel-billekes, en meteen stoaven d'r een stuk of dri-j van de tegenstanders vol in de reclameborden. En dan lachtten hi-j d'r óók nog zo typisch bi-j, zo'n gans kort staccato hèhèhèhè, met de lippen bi-jnoa op mekare.
Wietjen was een natuurtalent.
't was assoffe op een goochelcursus zat en datte, zonder dat hi-j d'r zélf erg in had, de complete beestenbende uut de arc van Noach uut 't huudjen toverden, in plaats van slechts dat witte konien. Volgens, mi-j verbaasden hi-j zichzelf nog 't hardst d'r oaver.
't ging 'm allemoal zoo makkeli-j af.
Ik wet 't niet meer gans precies, moar volgens mi-j juichden hi-j nie ens asse een goal had 'emaakt.
Asse vief man had uut 'espölt, inclusief de doelman, dan wachtten hi-j nog efkes gans ruhig, zodat den keeper nóg een kans kreeg, en dan tikten hi-j de bal alsnog drögjes deur de bene van den armen sluutpost.
Wietjen was de anti-held zonder al te grote ambities, zoas een hoop ander'n dat wél hadden, en die dus ook een ende wieter kwamen in de voetballeri-je.
Ik denk dan ook, dat as Wietjen écht profvoetballer was 'eworden, ze 'm dan binnen 't halfjoar invalide hadden geschopt, ömdat ze zökke clowns, die ow van alle kanten 'bezeikt' niet könt verdragen doar in dat saaie bloedserieuze wereldjen.
En volgens mi-j had Wietjen dat gans goed in de smiezen!
Dat was niks veur 'm.
't was mien wereldjen wieters óók niet, moar puur an sich qua voetballiefde, was Wietjen mien wereld.
Een klasse rasvoetballer zonder kapsones, met de lach an de konte, zij 't slechts in Dinxpèr.
Wietjen was óók een briljant strateeg én tacticus, den met een enkele geniale inval de ganse wedstried kon beheersen, en zelfs laoten stoppen asse dat écht wol. Zo hef hi-j 'ns een wedstried stil loaten leggen ömdatte zogenaamd een contactlenze kwiet was, en de keerl hat gar gin lenzen!
Alle spöllers an't zuuken in't gres!
En 't binnenpretpark van ons genie was weer geopend, en hi-j dacht waarschijnli-jk stilletjes bi-j zich eigens: 'Poe, poe, effen bi-jkommen van dat gedraaf!''
Later werkten hi-j ook nog bi-j Joop's snackar, en 't had mi-j niet vrömd 'elekken, asse doar ook nog an't jongeleren was 'eslagen met de gehaktballen. Moar doar deete wieters nix opvallends, behalve ontspannen de eerpels frituren.
Op de dag da-k hörden dat Wietjen plots noar de eeuwige voetbalvelden was vertrokken, kon ik niet gelöven dat zo'n jongensachtige vreugdefontijn inens was drög 'evallen. Ik had 'm toevallig de zoaterdag d'r veur nog bi-j Vrieze zien zitten met zien vrouw, toen ik d'r zelf ook was um met mien olde knakkers van S.V.D. Jan Bussink in 't zönneken te zetten. Jan en Wietjen, twee veur mi-j toen lèvende legendes en toonbeelden van bescheidenheid, now slechts nog legendes.
P.S. 't gekke is, realiseer ik mi-j now, da'k volgens mi-j nooit écht met 'm heb 'eproat.
Zelfs toen ik bi-j Eskes patat of zoo haalden, he'k 'm nooit 'ezegd hoe goed ik 'm wel niet vond.
Dat vin'k best wel jammer achteraf, moar van de andere kante, Cruijff he'k óók nooit 'esprokken.