Coronalia | 'Woningsdag ...'
Veur a'j mi-j d'rop anvalt: Met het gebroek van dit woord pleeg ik plagiaat, maor dat mot dan maor effen. Völle leu vindt et trouwens helemaols niks as alternatieven term veur Koningsdag 2020.
Maor lao'w eerlijk waen, völle meer zit der neet in van't jaor.
Hooguut zo'w hier van vroggerheer van 'Huusdag' praoten, maor da's dan ok 't enige. Plus dat natuurlijk een hoop mensen al wal zes waeke noodgedwongen huusdag hadden. Maor dán val i-j waarschienlijk niet meer aover 'n wóórd.
Dit gezegd hebbende, hop ik toch da'j ow gister'n hebt können schikken in dit onvermijdelijke. En aevengood (of juust(!) de vlagge hebt uut ehangen! Zelf bu'w trouwens meestal neet zo van dee 'haevendige koningsdaggangers', mo'k zeggen. Alhoewal, toen veurig jaor de Oranjevreening, 's morgens al bi-jtieds, een ontbijt klaor had staon in't Dorpshuus veur d'n hélen Nestiezern, was dat veur mi-j zowat 'de Zwarte Cross en Dauwtrappen in éne'. Dát he'w dus now node emist...
Maor goed, laot één ding duudelijk waen: Da's natuurlijk niet hálf zo arg, asdat álles wat vanwaegen 75 Jaor Bevrijding in't vat zat, niet deurging. Dat alle activiteiten waor met zovölle enthousiasme energie in is estokken, most worden af eblaozen: Van Aalten tut Amsterdam en van Dinxper tut in Duutsland. Tut straks de (openbare) 4 mei-Herdenking toe! Al blieve wi-j van Harte Hoppen dat wat in't vat zit, niet helemaol zal verzuurn!
Aoverigens; veur wie't toevallig op T.V. Gelderland den zogenuumden 'Bevrijdingskaravaan' (al dan niet) volgt, nog effen dit:
Op donderdag 30 april (ooit onzen Konneginnedag!) is de afsluuting van't programma. En precies daorin hef Iezerlo (at de wind zich niet dreeid) verduld ok nog een pleksken ekregen. Hélemaols an't 'vlieg-ende', maor tóch! (en 't wordt ieder uur herhaald!)
Of't mooi wórdt is altied weer afwachten. Maor a'j toch huusdag hebt ku-j d'r misschien mooi efkes veur gaon zitten…
Sien o Niem