In wat veur tied… (6)
Op 't moment van schrieven, liekt 't verduld of d'r qua beeld en geluud es effentjes wat ánders veurbi-j kump. Al kan't a'j dit laest al wal weer heel anders waen. Want ons dagelijkse klimaat kan zó maor weer ummeslaon.
Hoe dan ok: éfkes gin Sywerd of Wopken, Rutte en Kaag. (En veur Omtzigt hop ik zéker dat d'r endelijk röst kump daorumtrent.)
Inplaatse daorvan vermeie wi-j ons inmiddels met Memphis, Stefan, Dumfries, Frenkie en Blind. Ik doo maor's een (in)gooi...
Misschien krie'w langzamerhand zelfs wal egals minder Corana, Data, Zelftesten en Vaccinaties op ons bordjen. En wat meer 'Hollandia!' en Spelprestaties onder 't bottram aeten. Meer Voetbal as Covidgetallen, meer Sportveld as Malieveld. Meer informatie aover de Formaties van Frank, as van Mariëtte Hamer an de Formatietaofel.
Aevengood he'j natuurlijk ok een 'significant' volksdeel wiet van ál dizze dinge onderhand de boek vol hef. Of altied al hef ehad.
En jongeleu wiet baalt umdat de Zwarte Cross (in zienen orthodoxen vorm) opni-j neet deurgeet. Of de 'Oranjefans' wiet dizzen zommer van lieverlee op excursie naor de Golden Koetse gaot, inplaatse van wietweg te vliegen um daor in de zonne te liggen.
Misschien bunt d'r zelfs wal leu wiet 't belangrieker vindt at 't gres goed in de koele kump. Of anders wal zit te wachten op een tillefoontjen van't zeekenhuus, met de boodschap at endeleke owen heupoperatie deurgeet. Of den therapeut wiet ow een betjen helpen kan, um uut een zwart gat te kroepen. Wallicht mensen wiet eerst maor's de toeslage mot trugge zien te kriegen wiet eur rechtens toekomt , veur ze überhaupt an iets anders könt denken.
Veur mi-jzelf mark ik da'k nog een betjen 'dreuge zwemme' tussen wat écht holt snidt en wat völt onder de waan van d'n dag.
Starker nog; allene al met dat onderscheid te maken, ku'j al drok zat waen...
Ankh Gussinklo