Woar gebeurd
Veur duuzend gulden niet
Wil ik mien beddekussen kwiet
Ik kan niet zonder
Meestal ligt de ponne de onder
Soms een snotterduuksken
of een pocketbuuksken
Vrôgger op de Mulo, ak een repetitie had
Lukken et wel es niet glad
Ik had de gansen oavend eleerd
en et geprobeerd
Die saaie kost wol de moar niet in
Nog langer leer'n had gin zin
Ik heb 't thuus nooit ezegd...
Moar dan hek 't boek wel es een nacht onder 't kussen elegd
's Morgens ging i'j op schole an
En hoppen de moar 't beste van
Of 't now an dat kussen lag?
Och, misschien had de leraar een goelen dag
't Viel allemoale met
De wier netjes een 7 onder ezet.
En ik mot zeggen
As ik now elken oavend mien heufd op de matras mos leggen...
Nee, 't mot veur mien een kussen zun
Niet te dik, niet te dun.
Moar i'j stoat toch versteld
Wat de buren mi'j hebt verteld:
Ze gingen ok es vrog onder de lappen
Moar 't was net of ze argens op trappen
't Wazzen net beschuutkrömmels
Moar dat kon 't niet weazen
De buurvrouw probeer'n eerst nog wat te leazen
Moar zi'j
Hiel de gedachten de niet bi'j
Krömmels, moar dan zwat
Now dan wet ik nog niet wat
't Waren de moar een paar
Moar 't bleef raar
Inens lei ze stief van schrik
En stotterden ikke... ik...
Ze wees noa 't kussen en zel
Het was net of doar wat lei
Moar toen ston ze allang in den anderen hoek
Zo wit as un doek
Want onder 't kussen van de buurvrouw
Lag een beestjen... kleure... grijsgrauw
Un lèvende moes... Zowoar ak dit schrieve
Ow hatte zol de toch stille van blieven
Wi'j zûlt wel nooit meer heur'n
Hoe dat kon gebeur'n
Want wi'j hebt vernommen
Dat de katte um te pakken hef enommen
Een moes onder 't kussen...
Ik had et nog nooit eheurd
Moar toch is 't woar gebeurd.
Avanja (afkorting van Alie van Aornt-Jan, de vader van Alie)
Alie Maandag-Wensink,
Dinxperlo
Ingestuurd door Ben Maandag als eerbetoon aan zijn overleden vrouw Alie